Бид өөрсдийн дотоод Гэрэл гэгээг танин мэдэж, олж харахын хэрээр гадаад төрх байдал нь ямар байхаас үл хамааран бүх зүйлд орших тэрхүү Гэрэл гэгээг аяндаа танин мэддэг.

Одоо АНУ-ын Виржиниа мужаас Лаура-гийн ирүүлсэн сэтгэлийн үгийг олон хэлний хадмал орчуулгатай хүргэе:

Хайрт Их Багшаа гүнээ хүндэтгэн даруухнаар мэхийн ёсолъё. Суприм Мастер Телевизийн багийн бүх Гэгээнтнүүдэд хүндэтгэн мэнд хүргэе. Арьяабалын бясалгал хийсэн хувийн туршлагаасаа хуваалцахыг хүсч байна. 2000 онд авшиг хүртсэнээсээ хойш би Арьяабалын бясалгал буюу Гуань Ин (дотоодын Диваажингийн Аялгуу) мөн Гуань Гуан буюу (дотоодын Диваажингийн Гэрэл) бясалгал хийхэд өөрийгөө зориулж ирсэн бөгөөд миний материаллаг болон сүнслэг амьдрал аажмаар сайжирч, улам сайхан болсон. Би хэд хэдэн сүнслэг туршлага хуримтлуулсан боловч, хамгийн гүнзгий нь Зүрхэн Сударт дурдсан үнэнийг биеэрээ танин мэдэрсэн явдал юм. “Бүх юмс үзэгдэл өөрийн гэсэн тогтмол шинж чанар үгүй, үүсээгүй бөгөөд мөхөөгүй, бузар ч биш, ариун ч биш, нэмэгддэг ч үгүй, хорогддог ч үгүй” хэмээх төлөв үнэхээр ямар утгатайг би одоо тодорхой, гүнзгий ойлгож байна.

Урьд нь бүрхэг, ойлгоход бэрх санагддаг байсан бүх судрын утгыг би гэнэт тодорхой ухаарсан. Би “угаас орших мөн чанар ямагт гэрэлтсэн, тунгалаг, амгалан байдаг”-ийг мэдэрч, мөн Очирт сударт дурдсан “аливаа зүйлд үл баригдах, тогтож зууралдахгүй байх сэтгэлийг төрүүлэх” гэдэг нь ямар утгатайг ойлгосон. Би энгийн нүдээрээ барилга, тааз зэрэг хатуу мэт материаллаг зүйлс үнэндээ, бодит байдал дээр хатуу бишийг харж чадна. Тэд яг л усны мандал дээр бөөгнөрөн хөвдөг жижиг усны ургамал (нугасны өвс) шиг чичирч, доргиж байдаг. Мөн “бүх юмс үзэгдэл хоосон чанараас үүсдэг” гэж судруудад өгүүлсэн нь ямар утгатай болохыг би ойлгож ухаарсан. Мөнх бус чанар ч чухам энэ зарчмаас үүдэлтэй юм. Бүх зүйл ердөө л шалтгаан, нөхцөлийн дагуу нэгдэн бүрэлдэж, улмаар сарнин задрах үйл явц юм.

Одоо би аяга таваг угаах, хоол хийх, идэж уух зэрэг өдөр тутмын ажлаа хийх зуураа ч бясалгаж чаддаг. Байгаль, ургамал, өвс, чулуу зэрэг хамаг төрөлтнийг хайрлах сэтгэл надад аяндаа төрсөн. Би амьтан найз нөхөд, шавж хорхой, бүр өчүүхэн шоргоолжийг хүртэл, — хүн төрөлхтнийг бүр ч их хайрладаг.

Хэн нэгэн надад найрсгаар инээмсэглэн эелдгээр ярьж байсан ч, хэрэв зүрх сэтгэлдээ хорон санаа агуулж байвал, би тэр хуурамч дүр төрхийн цаана нуугдаж буй үнэнийг таньж чадна. Би зүгээр л чимээгүйхэн зайгаа барьдаг болсон бөгөөд тэдэнтэй сөргөлдөх, эсэргүүцэх сэтгэл надад цаашид төрөхөө больсон.

Түүнчлэн өдөр тутмын амьдралд минь олон гайхамшиг тохиолдсон бөгөөд үл үзэгдэх ивээл хамгаалалтыг би үргэлж мэдэрч ирсэн. Би Их Багшдаа хязгааргүй их талархдаг. Та бол миний амьдралын Гэрэл, энэ Саха ертөнцөд амар тайван амьдрах түшиг, хоргодох гэр минь билээ. Хайрт Их Багшдаа гүнээ хүндэтгэн мэхийж, талархлаа илэрхийлье. Их Багшийн Номын бие эрүүл энх, амгалан байж, нас буян нь улам арвижин, мэдэрхүйт төрөлтнүүдийг дэвшүүлж, дэлхийд энх тайвныг цогцлоох үйлсээ үргэлжлүүлэх урт нас, эрүүл мэндээр адислагдах болтугай хэмээн би залбирч байна. Арван зүгийн Бурхад Их Багшийг адислан хамгаалж, үргэлж аюулгүй, амгалан байлгах болтугай. Хүндэтгэсэн, АНУ-ын Виржиниа мужаас шавь Лаура

Өөрчлөгдсөн Лаура, Их Багшийн маань хайрын Хөтөчлөл дор бясалгаж олсон таны ухаарлуудыг сонсоход үнэхээр сайхан байна. Түүнээс авшиг хүртсэн бид бүгд насан туршид маань тасралтгүй адисалж, үгээр илэрхийлэхийн аргагүй амьдралын олон гайхамшгийг мэдрэх боломж олгодог хамгийн үнэт Бэлгийг хүртсэн. Энэ гараг болон түүнээс ч цааш орших хамаг төрөлтөн Их Багшийн хэмжээлшгүй их Нигүүлслийг танин мэдэж, Түүний арвин Адислалыг талархан хүртэх болтугай. Та болон хүчирхэг АНУ БУРХАНЫ хэмжээлшгүй Гэрлийн Диваажингийн туяанд умбах болтугай. Суприм Мастер Телевизийн баг

Жич: Их Багш танд баярлууштай хариу илгээлээ: “Хичээнгүй Лаура, таны сүнслэг ахиц дэвшлийг сонсоход баяртай байна! Бясалгалын үр шим олон янз боловч эцсийн дүндээ сүнслэг бясалгал гэдэг нь өдөр тутмын амьдралдаа хамгийн дээд ухамсарт оршин амьдарч, амьдралын зуурдын, түр зуурын мөн чанарыг нэвт ойлгож, танин мэдэхийн зэрэгцээ хамаг төрөлтөнтэй ямар ч ялгаварлан шүүлгүйгээр хайр, нэгдмэл байдлаар амьдрах явдал юм. Бид аливааг шүүн дүгнэх үедээ түүнийг бодит болгож, бүх юмс үзэгдэл хоосон чанараас үүсдэг гэдгийг ухамсарлахаа больдог. Ингэснээр бид төөрөгдлийн хүлээсэнд орж, жинхэнэ сэтгэлээ халхалдаг. Зөвхөн сүнслэг бясалгалаар л бид аливаа зүйлийг жинхэнэ байгаагаар нь харж чадна. Энэ нь бидэнд жинхэнэ эрх чөлөө, хязгааргүй хайрыг мэдрүүлдэг. Бид өөрсдийн дотоод Гэрэл гэгээг танин мэдэж, олж харахын хэрээр гадаад төрх байдал нь ямар байхаас үл хамааран бүх зүйлд орших тэрхүү Гэрэл гэгээг аяндаа танин мэддэг. Та болон эрх чөлөөг эрхэмлэгч АНУ-ын ард түмэн Цаглашгүй Хүчирхэг Нэгдсэн Гурвалын Нигүүлслээр чөлөөлөгдөх болтугай. ОРОЙН ДЭЭД БУРХАНЫ ИВЭЭЛЭЭР таны сүнслэг хөгжил цаашид ч үргэлжлэн дэвжих болтугай хэмээн маш их Хайр, Адислал илгээе!”