Зөгнөл дугаар 418 - Аюул гамшгийг арилгахын тулд Аврагчтай хамт Жинхэнэ Хайрыг сэрээ

Хопигийн зөгнөлд хүн төрөлхтөн дөрөв дэх ертөнцийн төгсгөлд ойртох үед илэрч үзэгдэх есөн шинж тэмдгийг тодорхой дурдсан байдаг бөгөөд тэдгээрийг бараг бүгд биелсэн гэж үздэг.

Жил бүр зургаадугаар сарын нар буцах үеэр дэлхий даяарх Нэгдмэл Дэлхий сүлжээ нь дэлхийн олон улсын нийгэмлэгүүдийг нэгтгэн, Дэлхийн Эв нэгдлийн Долоо хоногийг тэмдэглэх цахим уулзалтуудыг зохион байгуулдаг. Энэ нь есдүгээр сар хүртэл үргэлжлэх “Эв нэгдлээр энх тайвныг цогцлоох 99 өдөр”-ийн эхлэлийг тэмдэглэдэг. Энэ жил буюу 2026 онд уг арга хэмжээний сэдэв нь “Энх тайвныг сонго. Энх тайвнаар амьдар. Дайныг зогсоо” бөгөөд зохион байгуулагчдын нэг нь Эрхэм хүндэт Ахлагч Фил Лэйн Жуниор (веган) Ихэнктонван Дакота болон Чикасо Уугуул-Үндэстний хүн юм.

Зургаадугаар сарын 21-нээс есдүгээр сарын 27 хүртэлх 99 хоногийн турш олон янзын соёл, шашны гаралтай зочин илтгэгчид энэхүү хамтын платформоор дамжуулан өөрсдийн үзэл бодол, урам зориг өгсөн санаануудаа хуваалцана.

Тиймээс биднийг юу хүлээж байгааг бид огт мэдэхгүй. Гагцхүү энэ нь Бүтээгчийн маань Хүсэл гэдгийг л бид мэднэ. Энэхүү хүсэл нь Эх Дэлхий даяар оршин буй маш олон янзын уламжлалаар дамжин илэрхийлэгдсээр ирсэн бөгөөд энэ нь бидний хүн нэг бүр бүрэн эрхт, эртний бөгөөд мөхөшгүй, мөнхийн ариун оршихуй гэдгийг ойлгож, ухаарч эхлэх үед жинхэнэ сүнслэг төлөвшлийнхөө тэр үе рүү орох цаг болсон гэсэн үг гэдгийг хэлж байна.

Тиймээс 2026 он бол эв нэгдлийн хөдөлгөөний хувьд үнэхээр эргэлтийн чухал жил юм. Мөн бид эв нэгдлийн эрин үеийн үүрээр хамтдаа нэгдэн нийлж байна. Энэ бол бидний харилцан хамаарал болон эв нэгдлийг дэлхий нийтээрээ дахин санан ухамсарлаж, мөн хамтдаа хайр энэрлээр амьдрах болон дэлхий ертөнцөө эв зохиролд оруулахын төлөө бид хэрхэн хувьсан өөрчлөгдөж, хөгжиж буй үйл явц юм. Тиймээс уугуул ард түмний үзэл, ойлголтын үүднээс авч үзвэл, энэ үе бол хүн төрөлхтөн болон Эх Дэлхий урт хугацааны ариуслын үеийг туулсны дараах гараг ертөнцийн шинэ мөчлөгийн эхлэлийг илэрхийлж байгаа Шинэ Үүрийн цаг юм.

Намайг яг одоо сонсож байгаа та бүхний хүн бүр нийт хүн төрөлхтөнд хэрхэн илүү их тус хүргэж, үйлчилж болох вэ гэдгийг өөрөөсөө асуусан. Хөл доорх газар нь шилжин хөдөлж байгаа мэт, амьдрал нь эрс өөрчлөгдөж байгааг мэдэрч буй хүмүүст нэн шаардлагатай болсон шинэ нийгмийн тогтолцоо, шинэ сэтгэлгээний үзэл санаа, хэв маягыг бий болгоход та хэрхэн тусалж чадах вэ? Та бүхэн бол хатаж гандсан хөрснөөс цухуйж буй нялх ногоон нахианууд билээ. Та бүхэн бол дэлхийн итгэл найдвар. Яаж энэ бүхнийг хийхээ одоо мэдэхгүй байсан ч санаа зовох хэрэггүй. Та бүхэн Нэгдсэн Дэлхий, Хувьслын Манлайлагчид ба Хувьслын Түншүүдийн Сүлжээ, Холохөдөлгөөн, Хүмүүн төрөлхтний Баг, Дэлхийн Энх тайвны Хамт олон, мөн Бид бол Дэлхий, Шилжилтийн сүлжээ зэрэг олон бүлэг, хөдөлгөөнд аяндаа нэгдэж байна.

Бүх ариун нандин уламжлал нь нэгэн цогц хувьслын урсгал дотор оршдог бөгөөд хүн төрөлхтнийг хувь заяа, зорьсон ирээдүй рүү нь чиглүүлэн хөтөлж буй тэнгэрлэг ивээл, онгодоор өдөөгдсөн хүчээр удирдуулдаг. Одоо эдгээр загвар, арга барилд ‘эв нэгдлийн зам’-ыг мөн нэмэх цаг болжээ. Үүнийг ариун нандин зүйлд хандах Бахайн шашны арга барил гэж тодорхойлж болох юм. 19-р зууны дунд үеийн Персийн хагарал, зөрчилдөөн, тэгш бус байдлын дундаас бүх хүн төрөлхтний эв нэгдлийг бий болгох зорилготой нэгдмэл үзэлтэй, тодорхой зарчмуудыг агуулсан сүнслэг шинэчлэл үүссэн.

Миний ажигласнаар уугуул ард түмэн өөрсдийн сүнслэг үндэс, язгууртайгаа илүү ойр холбоотой байдаг. Мөн тэд Дэлхийтэйгээ болон бие биетэйгээ холбоотой гэсэн эдгээр бодит холбоо, харилцан хамаарлын ойлголтод илүү бат суурилсан, гүн бат холбоотой байдаг юм шиг санагддаг. Мөн тэдэнд маш олон жилийн турш уламжлагдан ирсэн ийм уламжлалууд байдаг. Мөн Антуанеттын хэлдэг шиг,

бид дэлхийгээр аялахдаа тэдгээрийг хаа сайгүй олж хардаг шүү дээ. Бид үүнийг “Намастэ” буюу “Миний доторх БУРХАН таны доторх БУРХАНЫГ харж байна” гэх үгээс олж хардаг. Бид бүгд үүнийг сайн сайхан зүйлсээс, түүнчлэн бид БУРХАНЫ хүүхдүүд, ахан дүүс гэсэн сайн мэдээнээс ч олж хардаг. “Өөртөө хэрхэн хандаасай гэж хүсдэгтэйгээ адил бусдад ханд” гэсэн Алтан дүрмээс ч үүнийг хардаг. Тиймээс энэ бол дэлхий нийтийн бодит үнэн.

ГЭХ МЭТ...

“Эв нэгдлээр энх тайвныг цогцлоох 99 өдөр” арга хэмжээ үргэлжилж, есдүгээр сарын 27-нд өндөрлөх үед, нэр хүндтэй илтгэгчдийн ухаалаг, гэгээрүүлэгч үгс сонсоход бэлэн, нээлттэй өргөн хүрээний хүмүүс, олон сонсогчдод хүрч, энх тайвны эрин үеийн эхлэлийг асаана хэмээн бид найдаж байна. Эрхэм хүндэт Ахлагч Фил Лэйн Жуниорт болон Дэлхийн түүхийн энэхүү эгзэгтэй, чухал үед зоригт манлайлагч болж буй бүх мэргэн ухаант уугуул иргэдэд талархал илэрхийлье.

Уугуул-Үндэстнүүдийн мэргэн ухаан нь эртний домог, ардын аман зохиолоор нь дамжин үеэс үед өвлөгдөн уламжлагддаг. Тэдгээрийн зарим нь Дэлхийн үүсэл, Түүний хөгжлийн мөчлөг болон хүн төрөлхтний ирээдүйг өгүүлдэг.

Навахо ард түмний бүтээлийн домог нь Орчлон ертөнц, Дэлхий болон Навахо ард түмний гарал үүслийг тайлбарласан ариун хүүрнэл юм. Энэ нь зөвхөн дэлхий ертөнц хэрхэн бий болсон тухай домог төдий биш, харин бүхий л амьдралын тэнцвэр, эв зохицол, харилцан холбоо, хамаарлын тухай гүн гүнзгий сургаалыг өгүүлдэг сүнслэг аялал юм. Энэ домгийн гол хэсэгт эртний оршин суугчдыг бүтээлийн өөр өөр үе шатыг төлөөлөх олон ертөнцөөр замчилсан Диин Динэ-э буюу ариун хүмүүс, Бурхад болон бусад ер бусын хүчирхэг оршихуйнууд байдаг. Эдгээр Диин Динэ-э нь зүгээр нэг бурхад төдий биш; тэд бол байгалийн ертөнцийн багш нар, хамгаалагчид бөгөөд Асран хамгаалагчид юм. Тэдний үйлдэл, шийдвэрүүд дэлхий ертөнцийг бүрэлдүүлж, Навахо ард түмний амьдралдаа баримталдаг зарчмуудыг тогтоосон.

Хопи ард түмэн Аризонагийн Гурван Меса хэмээх нутагт олон мянган жилийн турш амьдарч ирсэн бөгөөд зөгнөлийн эртний уламжлалтай.

Хопи ард түмэн олон зууны турш зөгнөл гэх ойлголтыг даган амьдарч ирсэн бөгөөд түүнийгээ үеэс үед уламжлан дамжуулдаг.

Тэд дэлхийг өөрсдийн Эх, Нарыг өөрсдийн Эцэг хэмээн итгэдэг.

Тэд яг одоо дэлхий ертөнцийн талаар маш их санаа зовж байна.

Хопи ард түмэн дэлхий гурван удаа бүтээгдэж, гурван удаа сүйрсэн гэж үздэг.

Тэд дэлхийн хэд хэдэн эрин үе байдаг ба хүмүүс эдгээр үе шатуудыг дамжин өнгөрдөг гэж үздэг бөгөөд Хопи ардын олон ахмадын үздэгээр бид одоо дөрөв дэх ертөнцийн төгсгөлд байна.

Хопигийн домогт өгүүлснээр, бидний одоогийн ертөнцөөс өмнөх ертөнц бүр нь асар том гамшиг, их сүйрлээр төгсжээ.

Эхний ертөнц галын улмаас төгссөн, хоёр дахь ертөнц мөсний улмаас төгссөн, гурав дахь ертөнц асар их үерийн улмаас сүйрсэн. Мөн Хопи ардын олон ахмадын үздэгээр, бид дөрөв дэх ертөнцийнхөө яг төгсгөлд хүрээд байгааг илтгэх янз бүрийн зөгнөлийн шинж тэмдэг байдаг.

Хопигийн зөгнөлд хүн төрөлхтөн дөрөв дэх ертөнцийн төгсгөлд ойртох үед илэрч үзэгдэх есөн шинж тэмдгийг тодорхой дурдсан байдаг бөгөөд тэдгээрийг бараг бүгд биелсэн гэж үздэг.

Эртний Баавгай овгийн Цагаан Өд хэмээх Уугуул-Үндэстний Хопи ахмадыг жар гаруй жилийн өмнө Хопи Уугуул-Үндэстний зөгнөлийг анх гадаад ертөнцөд танилцуулсан хүн байсан гэж ярьдаг.

Цагаан Өдийн хэлснээр, эхний шинж тэмдэг нь өөрсдийнх нь биш газар нутгийг булаан эзэлж, дайснуудаа аянга мэт хүчээр цохих цагаан арьст хүмүүс ирэх явдал байжээ. Хопи ард түмний хувьд энэ нь буу зэвсгийг хэлж байв.

Хоёр дахь шинж тэмдэгт дуу хоолойгоор дүүрсэн эргэлдэгч дугуйнууд газар нутгаар өнхрөн явж, суурьшигчид болон тэдний гэр бүлээр дүүрсэн дээвэртэй тэрэгнүүд тал нутгийг гаталж буйг дүрсэлжээ.

Гурав дахь шинж тэмдэгт одос үхэртэй төстэй боловч асар урт эвэртэй хачин амьтад газар нутгийг үлэмж олноороо дүүргэн эзлэх болно хэмээн анхааруулжээ. Тэдгээр нь удалгүй Америкийн өрнөд нутгийг бүхэлд нь бүрхсэн урт эвэрт үхэр сүрэг юм.

Дөрөв дэх шинж тэмдгээс л хачирхалтай зүйлс эхэлдэг. Цагаан Өд газар нутгийг төмөр могойнууд хөндлөн гулд гатална гэжээ. Итгэгчид үүнийг төмөр зам гэж үздэг.

Тав дахь шинж тэмдэгт “Газар нутгийг аварга аалзны тороор хэрэн сүлжин бүрхэнэ” гэжээ. Цагаан Өд 1958 онд үүнийг Дэвид Янгт хэлэх үед цахилгаан болон утасны шугам гэж нийтээр тайлбарлаж байв. Харин сүүлийн 20 жилд хүмүүс тэр шинж тэмдгийг огт өөрөөр тайлбарлаж эхэлсэн. Бүх Дэлхийг хөндлөн гулд сүлжсэн аварга том тор мэт, бидний түүнд нууцаар бичиж оруулдаг бүх зүйл доторх дуу хоолой болон дүрсийг дамжуулдаг зүйл гэж үзэх болсон. Одоо итгэгчид Цагаан Өд огтхон ч утасны шонг дүрслээгүй гэж хэлж байна. Тэд түүнийг дэлхийг бүхэлд нь бүрхсэн сүлжээ буюу интернэтийг дүрсэлсэн гэж хэлдэг.

Зургаа дахь шинж тэмдэгт Наранд дүрс зураг үүсгэдэг чулуун голуудын талаар анхааруулжээ. Чулуун голууд. Итгэгчид үүнийг муж хоорондын хурдны замын сүлжээтэй холбон тайлбарладаг.

Долоо дахь шинж тэмдэгт, “Тэнгис харлан хувирч, үүнээс болж олон амьд биет үхэж буй тухай та нар сонсоно” гэж өгүүлсэн. Өнөөдөр хүмүүс үүнийг уншихад ганцхан зүйл санаанд нь ордог: газрын тос. Хар түрлэг далайн эрэг рүү түрэн орж, шувууд түүнд бүрхэгдэн, загас агнуурын салбар сүйдсэн. Тэнгис хар болж, амьд биетүүд үхэж байгаа нь долоо дахь шинж тэмдэгт яг анхааруулсанчлан болж байна.

Ингээд найм дахь шинж тэмдэгт хүрнэ. Энэ нь өмнөх бүх шинж тэмдгээс өөр, учир нь энэ удаагийнх анхааруулга биш. Энэ удаагийнх бараг л найдвар төрүүлсэн санаа агуулдаг. Цагаан Өд “Миний ард түмэн шиг урт үстэй олон залуу хүмүүс ирж, овог аймгуудын үндэстнүүдтэй нэгдэн, тэдний амьдралын хэв маяг, ёс заншил, мэргэн ухаанаас нь суралцахыг та нар харна” гэж хэлжээ. Итгэгчдийн хувьд энэ нь 1960-аад оны үе юм. Тэр үед урт үст залуусын нэгэн үе материаллаг, техникжсэн нийгмээс татгалзаж, Дэлхий болон Хопичуудын хадгалж ирсэн яг тэр төрлийн мэргэн ухаанд хандсан юм.

Цагаан Өдийн дурдсан ес дэх буюу сүүлчийн шинж тэмдэг нь тэнгэр дэх нууцлаг биетийг заадаг.

Цэнхэр Од Качинагийн тухай Хопичуудийн зөгнөл нь шууд бөгөөд цочирдом мэдэгдлээр эхэлдэг. Нэгэн өдөр, тэнгэрт цэнхэр од гарч ирж, Дэлхийн бүх оршин суугчдад харагдана. Түүний ирэлт нь дөрөв дэх ертөнцийн төгсгөл буюу хүн төрөлхтний одоогийн соёл иргэншлийн эрин үе дуусаж, тав дахь ертөнц бий болох замыг бэлтгэх цэвэршүүлэлт, ариуслын үе эхэлж байгааг илтгэнэ.

Дэлхийн бүх хүнд харагдах цэнхэр өнгийн сансрын биет гэж юу гэсэн үг вэ? Энэ дүрслэл нь 2025 оны сүүлээр Дэлхийн тойрог замаар дайран өнгөрч, дэлхийн өнцөг булан бүрийн хүмүүст харагдан, асар их шуугиан тарьсан 3I/ATLAS сүүлт одыг санагдуулж байна.

Хэдийгээр сүүлт одод Нартай ойртох үед ийм төлөвтэй болох нь хэвийн гэж үздэг ч, 3I/ATLAS нийтлэг хэв маягийг дагаагүй. Сүүлт одод Нарны ойролцоо ирэх үедээ ихэвчлэн улаан өнгөтэй харагддаг. Учир нь тэдний эргэн тойрон дахь тоос шороо нарны гэрлийг сарниулж, улаавтар өнгө үүсгэдэг. Гэвч од хоорондын энэ сүүлт од цэнхэр өнгөтэй болсон нь гайхмаар зүйл юм.

Эрдэмтдийн үзэж байгаагаар, 3I/ATLAS-ын цэнхэрдүү өнгө нь энгийн сүүлт оддынх шиг тоос биш, харин хийн найрлагатай байж болохыг илтгэжээ. 3I/ATLAS нь Хопи Уугуул-Үндэстний зөгнөл дэх Цэнхэр Од Качина байж болох уу? Хэрэв тийм бол, дөрөв дэх ертөнцийн төгсгөлийг зөгнөн илтгэдэг есөн шинж тэмдэг бүгд биелж, хүн төрөлхтөн одоо ариуслын үед орсон бололтой. Үүнийг дэлхий даяар, ялангуяа 2025 оноос хойш гарсаар байгаа томоохон гамшгуудаар баталгаажуулж болно. ГЭХ МЭТ...

Ариуслын үеийг даван туулахын тулд бид юу хийх ёстой вэ? Дэлхий дээрх энэ хүнд, харанхуй үе өнгөрсний дараа Уугуул-Үндэстнүүдийн зөгнөлүүдийн дагуу юу болох вэ? Дараагийн дугаараас үүнийг олж мэдэцгээе.